ကုန်သည်စက်မှုအသင်းချုပ် နှင့် ကိုရီးယား-အာရှ စီးပွားရေး ပူးပေါင်းဆောင်ရွက်မှုအသင်း နားလည်မှု စာချွန်လွှာရေးထိုး

Written by  //  June 19, 2018  //  UMFCCI News  //  No comments

မြန်မာနှင့် ကိုရီးယား စီးပွားရေးအသိုက်အဝန်းများအကြား အကျိုးတူ စီးပွားရေး ပူးပေါင်းလုပ်ဆောင်ရေး၊ နှစ်ဖက် လုပ်ငန်းရှင်များ ချိတ်ဆက်တွေ့ဆုံရေး နှင့် နှစ်ဖက် စီးပွားရေးဆိုင်ရာ အခွင့်အလမ်းများအား အပြန်အလှန် ဝေမျှနိုင်ရေး စသည့် လုပ်ငန်းများ၌ လက်တွဲဆောင်ရွက်ရန် နားလည်မှုစာချွန်လွှာတစ်ရပ်ကို ကုန်သည်စက်မှုအသင်းချုပ် နှင့် ဆိုးလ်မြို့အခြေစိုက် ကိုရီးယား-အာရှ စီးပွားရေး ပူးပေါင်းဆောင်ရွက်မှုအသင်း (Korea-Asia Economic Cooperation Association – KOAECA) တို့ ဇွန်လ ၁၉ ရက်နေ့ ညနေပိုင်းတွင် ရေးထိုးကြသည်။

စာချွန်လွှာအရ ကုန်သည်စက်မှုအသင်းချုပ် နှင့် KOAECA သည် နှစ်နိုင်ငံအကြား စီးပွားဆက်ဆံရေးမြှင့်တင်ရန် ရည်ရွယ်၍ နှစ်ဖက်လုပ်ငန်းရှင်များ၏ စီးပွားရေးဆိုင်ရာ ခရီးစဉ်များ စီစဉ်ခြင်း၊ စီးပွားရေးပညာရှင်များ အပြန်အလှန် စေလွှတ်ခြင်း၊ စီးပွားရေး ပူးပေါင်းဆောင်ရွက်မှုဆိုင်ရာ ဆွေးနွေးပွဲများ ကျင်းပခြင်းတို့ကို ပူးပေါင်းဆောင်ရွက်ရမည် ဖြစ်ပြီး၊ နှစ်ဖက်လုပ်ငန်းရှင်များ၏ ရင်းနှီးမြှုပ်နှံမှု နှင့် ကုန်သွယ်မှုလုပ်ငန်းများအား အဆင်ပြေချောမွေ့စေရန် ကူညီဆောင်ရွက်ကြမည် ဖြစ်သည်။

“မြန်မာနိုင်ငံမှာ ရင်းနှီးမြှုပ်နှံချင်တဲ့ ကိုရီးယားလုပ်ငန်းရှင်တွေ အမြောက်အမြားရှိပါတယ်။ မြေနေရာ၊ လုပ်သားအင်အား စတဲ့ မြန်မာနိုင်ငံရဲ့ အားသာချက်တွေကို ကိုရီးယားရဲ့ ခေတ်မီနည်းပညာတွေ၊ စီမံခန့်ခွဲမှုအတတ်ပညာတွေနဲ့ ပေါင်းစပ်လိုက်ရင် ကျွန်တော်တို့ လုပ်ငန်းအောင်မြင်မှာ အသေအချာပါပဲ”

ဟု KOAECA ဥက္ကဌ Dr. Lee Nam Kee ကပြောသည်။

ကုန်သည်စက်မှုအသင်းချုပ် ဥက္ကဋ္ဌ ဦးဇော်မင်းဝင်းက

“ကိုရီးယားနိုင်ငံက တာဝန်ယူမှု၊ တာဝန်ခံမှုရှိတဲ့ ရင်းနှီးမြုပ်နှံမှုတွေကို ဖိတ်ခေါ်ချင်ပါတယ်။ ကိုရီးယား ရင်းနှီးမြှုပ်နှံမှုတွေကတစ်ဆင့် နည်းပညာ၊ အတတ်ပညာတွေရယူပြီး မြန်မာနိုင်ငံမှာ ကျွမ်းကျင် လုပ်သားတွေ မွေးထုတ်ပေးနိုင်ဖို့ မျှော်လင့်ပါတယ်”

ဟု ပြောသည်။

စာချွန်လွှာသည် ရေးထိုးသည့်နေ့ ၂၀၁၈ ခုနှစ် ဇွန်လ ၁၉ ရက် မှ စတင် အသက်ဝင်ပြီး၊ သုံးနှစ်ကြာ သက်တမ်းရှိမည် ဖြစ်သည်။ စာချွန်လွှာကို ကုန်သည်စက်မှုအသင်းချုပ် ဥက္ကဋ္ဌ ဦးဇော်မင်းဝင်းနှင့် KOAECA ဥက္ကဌ Dr. Lee Nam Kee တို့က ကုန်သည်စက်မှုအသင်းချုပ် အဆောက်အဦတွင် ရေးထိုးခဲ့ကြခြင်း ဖြစ်ပါသည်။

KOAECA သည် ကိုရီးယားနိုင်ငံ နိုင်ငံခြားရေးဝန်ကြီးဌာန လက်အောက်ရှိ အကျိုးအမြတ်မယူသော အဖွဲ့အစည်းဖြစ်ပြီး၊ ကိုရီးယားနိုင်ငံနှင့် အာဆီယံနိုင်ငံများအကြား စီးပွားဆက်ဆံရေးနှင့် ရင်းနှီးမြှုပ်နှံမှုကို တိုးမြှင့်နိုင်ရန် ဆောင်ရွက်နေသည့် အဖွဲ့အစည်းဖြစ်သည်။

ရင်းနှီးမြှုပ်နှံမှု နှင့် ကုမ္ပဏီများညွှန်ကြားမှု ဦးစီးဌာနမှ ထုတ်ပြန်သည့် စာရင်းအရ ကိုရီးယားနိုင်ငံသည် မြန်မာနိုင်ငံအတွင်း နိုင်ငံခြား ရင်းနှီးမြှုပ်နှံမှု အများဆုံးပြုလုပ်သည့် နိုင်ငံများအနက် အမှတ်စဉ် (၆) တွင် ရပ်တည်နေပြီး၊ ၂၀၁၈ ခုနှစ် မေလအထိ ကန်ဒေါ်လာ ၃.၈ ဘီလျံကျော် ရင်းနှီးမြှုပ်နှံထားသည်။

About the Author

UMFCCI Administration Team. Please contact the Public Relations Unit at UMFCCI, Tel: 01-2314344 Ext 323.

View all posts by

Leave a Comment

comm comm comm