စဉ်ဆက်မပြတ် ဖွံ့ဖြိုးတိုးတက်ရေး ရည်မှန်းချက်ပန်းတိုင်များဖော်ဆောင်ရေး ကုလသမဂ္ဂနှင့် မြန်မာ့ပုဂ္ဂလိကကဏ္ဍ ပူးပေါင်းမည်

Written by  //  August 22, 2017  //  UMFCCI News  //  No comments

ကမ္ဘာ့ကုလသမဂ္ဂက ချမှတ်ထားသည့် စဉ်ဆက်မပြတ် ဖွံ့ဖြိုးတိုးတက်ရေး ရည်မှန်းချက်ပန်းတိုင်များ (Sustainable Development Goals – SDGs) အား မြန်မာနိုင်ငံတွင် ထိရောက်စွာဖော်ဆောင်ရေးအတွက် မြန်မာနိုင်ငံဆိုင်ရာ ကုလသမဂ္ဂ ဌာနေညှိနှိုင်းရေးမှူး မစ္စ ရီနားတားနှင့် ကုန်သည်စက်မှုအသင်းချုပ်တို့ သြဂုတ်လ ၂၁ ရက်နေ့တွင် တွေ့ဆုံခဲ့ကြသည်။

မစ္စရီနားတားနှင့် ဆွေးနွေးရာတွင် ကုလသမဂ္ဂ အဖွဲ့အစည်းများနှင့် ပုဂ္ဂလိကကဏ္ဍတို့အကြား ပိုမိုကျွမ်းဝင်ပြီး ထိရောက်သည့် ဆက်ဆံရေးတစ်ရပ်ထူထောင်ပြီး၊ နိုင်ငံတွင်း SDG ရည်မှန်းချက်ပန်းတိုင်များ ဖော်ဆောင်ရေးတွင် ပူးပေါင်းဆောင်ရွက်ကြရန် သဘောတူကြပါသည်။

လက်ရှိမြန်မာ့စီးပွားရေးလုပ်ငန်းများ ဆောင်ရွက်နေကြသည့် CSR လုပ်ငန်းများက ကုလသမဂ္ဂ၏ SDG ရည်မှန်းချက်ပန်းတိုင်များကို တိုက်ရိုက်အထောက်အပံ့ပြုပါသည်။ ထို့အပြင် လူမှုအကျိုးသက်ရောက်မှုရှိသော လုပ်ငန်းများ ဥပမာ – လူမှုအကျိုးပြု စီးပွားရေးလုပ်ငန်းများ (Social Enterprises)၊ ရေဆိုးသန့်စင်လုပ်ငန်းများ နှင့် ပြန်လည်ပြည့်ဖြိုးမြဲစွမ်းအင်လုပ်ငန်းများတွင် တာဝန်ကျေစွာ ဆောင်ရွက်ခြင်းက SDG ပန်းတိုင်များကို အလိုအလျောက် ဖြည့်စည်းနေခြင်းဖြစ်ကြောင်း မစ္စရီနားတားက ပြောသည်။

အသင်းချုပ် ဥက္ကဋ္ဌ ဦးဇော်မင်းဝင်းက အသင်းချုပ်၏ လတ်တလော လှုပ်ရှားမှုများဖြစ်ကြသည့် Business for Peace နှင့် Myanmar Private Sector Disaster Management Network တို့အကြောင်းကို မစ္စရီနားတားအား အသိပေးပြောပြခဲ့သည်။

SDG ရည်မှန်းချက်ပန်းတိုင်များ အများစုမှာ ပုဂ္ဂလိက စီးပွားရေးကဏ္ဍနှင့် ဆက်နွယ်နေပါသည်။ ဥပမာ – ပန်းတိုင်အမှတ် (၈)၊ (၁)၊ (၂)၊ (၁၂) ဖြစ်ကြသည့် စီးပွားရေးဖွံ့ဖြိုးတိုးတက်မှု၊ ဆင်းရဲမွဲတေမှုပပျောက်ရေး၊ ငတ်မွတ်မှု ပပျောက်ရေး၊ တာဝန်ကျေသော သုံးစွဲမှု စသည်တို့မှာ စီးပွားရေးလုပ်ငန်းများနှင့် တိုက်ရိုက်သက်ဆိုင်သည်။
ပုဂ္ဂလိကကဏ္ဍမပါပဲ SDG ပန်းတိုင်များ ပြည့်မြောက်အောင် ဆောင်ရွက်နိုင်မှာမဟုတ် ဟု အသင်းချုပ် အကြံပေးပုဂ္ဂိုလ် ဒေါက်တာအောင်ထွန်းသက်က ပြောသည်။

အစည်းအဝေးတွင် ကုလသမဂ္ဂနှင့် ကုန်သည်စက်မှုအသင်းချုပ်တို့ ပူးပေါင်းလုပ်ဆောင်နိုင်ရန်အတွက် ပူးပေါင်းဆောင်ရွက်မှု မူဘောင်တစ်ရပ် ချမှတ်ရန် သဘောတူခဲ့ကြသည်။ အဆိုပါမူဘောင်ချမှတ်ရေးနှင့် ဖော်ဆောင်ရေးတို့အတွက် ကုန်သည်စက်မှုအသင်းချုပ်တွင် အတွင်းရေးမှူးရုံးအဖွဲ့ ဖွဲ့စည်းကာ ညှိနှိုင်းဆောင်ရွက်သွားရန် ဆုံးဖြတ်ခဲ့ကြပါသည်။

ကနဦးလုပ်ငန်းများအနေဖြင့် ပုဂ္ဂလိကစီးပွားရေးလုပ်ငန်းများက SDG ပန်းတိုင်များကို အထောက်အကူပြုနိုင်သည့် နည်းလမ်းများကို လုပ်ငန်းရှင်များနှင့် အများပြည်သူတို့အကြား ကျယ်ကျယ်ပြန့်ပြန့်အသိပညာပေးရေးနှင့် ဆောင်ရွက်နေသည့် လုပ်ငန်းများအား ဂုဏ်ပြုပေးရေး တို့ကို ဆောင်ရွက်ကြမည်ဖြစ်ပါသည်။
ပူးပေါင်းဆောင်ရွက်မှုကို ရန်ကုန်မြို့ရှိ ပုဂ္ဂလိကလုပ်ငန်းရှင်များသာ ပါဝင်စေသည်မဟုတ်ပဲ တိုင်းနှင့် ပြည်နယ်အသီးသီးရှိ ကုန်သည်စက်မှုအသင်းများမှတစ်ဆင့် သက်ဆိုင်ရာဒေသခံလုပ်ငန်းရှင်များ ပါဝင်လာအောင် ဆောင်ရွက်မည်ဟု အသင်းချုပ် ဥက္ကဋ္ဌက ပြောပါသည်။

ကုန်သည်စက်မှုအသင်းချုပ်အနေဖြင့် ကုလသမဂ္ဂအဖွဲ့အစည်းများတွင် UNIDO, UNDP, UNOCHA တို့နှင့် စီးပွားရေးနှင့် စက်မှုလုပ်ငန်းများဖွံ့ဖြိုးလာစေရေးနှင့် သဘာဝဘေးအန္တရာယ်စီမံခန့်ခွဲမှု လုပ်ငန်းများတွင် နီးကပ်စွာ ပူးပေါင်းဆောင်ရွက်လျက်ရှိပါသည်။

ကုန်သည်စက်မှုအသင်းချုပ်

About the Author

View all posts by

Leave a Comment

comm comm comm